Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 9.46 | Dem. 9.50 (English) | >>Dem. 9.54 |
9.48πρῶτον μὲν γὰρ ἀκούω Λακεδαιμονίους τότε καὶ πάντας τοὺς ἄλλους , τέτταρας μῆνας ἢ πέντε , τὴν ὡραίαν αὐτήν , ἐμβαλόντας ἂν καὶ κακώσαντας τὴν χώραν ὁπλίταις καὶ πολιτικοῖς στρατεύμασιν ἀναχωρεῖν ἐπʼ οἴκου πάλιν · οὕτω δʼ ἀρχαίως εἶχον , μᾶλλον δὲ πολιτικῶς , ὥστʼ οὐδὲ χρημάτων ὠνεῖσθαι παρʼ οὐδενὸς οὐδέν , ἀλλʼ εἶναι νόμιμόν τινα καὶ προφανῆ τὸν πόλεμον .
9.49νυνὶ δʼ ὁρᾶτε μὲν δήπου τὰ πλεῖστα τοὺς προδότας ἀπολωλεκότας , οὐδὲν δʼ ἐκ παρατάξεως οὐδὲ μάχης γιγνόμενον · ἀκούετε δὲ Φίλιππον οὐχὶ τῷ φάλαγγʼ ὁπλιτῶν ἄγειν βαδίζονθʼ ὅποι βούλεται , ἀλλὰ τῷ ψιλούς , ἱππέας , τοξότας , ξένους , τοιοῦτον ἐξηρτῆσθαι στρατόπεδον .
9.50ἐπειδὰν δʼ ἐπὶ τούτοις πρὸς νοσοῦντας ἐν αὑτοῖς προσπέσῃ καὶ μηδεὶς ὑπὲρ τῆς χώρας διʼ ἀπιστίαν ἐξίῃ , μηχανήματʼ ἐπιστήσας πολιορκεῖ . καὶ σιωπῶ θέρος καὶ χειμῶνα , ὡς οὐδὲν διαφέρει , οὐδʼ ἐστὶν ἐξαίρετος ὥρα τις ἣν διαλείπει .
9.51ταῦτα μέντοι πάντας εἰδότας καὶ λογιζομένους οὐ δεῖ προσέσθαι τὸν πόλεμον εἰς τὴν χώραν , οὐδʼ εἰς τὴν εὐήθειαν τὴν τοῦ τότε πρὸς Λακεδαιμονίους πολέμου βλέποντας ἐκτραχηλισθῆναι , ἀλλʼ ὡς ἐκ πλείστου φυλάττεσθαι τοῖς πράγμασι καὶ ταῖς παρασκευαῖς , ὅπως οἴκοθεν μὴ κινήσεται σκοποῦντας , οὐχὶ συμπλακέντας διαγωνίζεσθαι .
9.52πρὸς μὲν γὰρ πόλεμον πολλὰ φύσει πλεονεκτήμαθʼ ἡμῖν ὑπάρχει , ἄν περ , ὦ ἄνδρες Ἀθηναῖοι , ποιεῖν ἐθέλωμεν ἃ δεῖ , ἡ φύσις τῆς ἐκείνου χώρας , ἧς ἄγειν καὶ φέρειν ἔστι πολλὴν καὶ κακῶς ποιεῖν , ἄλλα μυρία · εἰς δʼ ἀγῶνα ἄμεινον ἡμῶν ἐκεῖνος ἤσκηται .
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 9.46 | Dem. 9.50 (English) | >>Dem. 9.54 |